ថ្មីៗនេះផ្ទុះការចែករំលែកពេញបណ្ដាញសង្គមវៀតណាម ក្រោយក្រុមមិត្តភក្ដិជិតស្និទ្ធមួយក្រុមកំពុងអង្គុយញ៉ាំអាហារជុំគ្នានៅមុខផ្ទះ ស្រាប់តែមានសត្វពស់មួយក្បាលវារចូលវង់ ធ្វើឱ្យរត់ចែកជើងគ្នាព្រាត។
ហេតុការណ៍មួយនេះបានកើតឡើងនៅថ្ងៃទី ១០ ខែមករា កន្លងទៅនេះ ហើយក៏ត្រូវបានចែករំលែកតគ្នាពីគណនីមួយទៅគណនីមួយនៅលើបណ្ដាញសង្គមវៀតណាម ដោយខណៈពេលដែលកំពុងញ៉ាំអីជុំគ្នា សត្វពស់ពណ៌ខ្មៅមួយក្បាលបានវារពីក្រោយចូលមកក្នុងវង់។
ដំបូងឡើយសមាជិកទាំងអស់មិនបានចាប់អារម្មណ៍នោះទេ លុះដល់ពេលពិនិត្យច្បាស់ទើបដឹងថាជាពស់ ក៏ភ្ញាក់ផ្អើលហើយរត់បែកវង់។ មិនត្រឹមតែប៉ុណ្ណឹងសមាជិកម្នាក់ហាក់ភិតភ័យពេកបានចាប់កន្ទុយពស់នោះគ្រវីជាច្រើនជុំ ដោយមិនដឹងខ្លួន។
ក្រោយឃើញវីដេអូនេះមហាជនជាច្រើនក៏បានចូលរួមបញ្ចេញមតិបែបលេងសើចថា ៖ «ឱ្យខ្ញុំសុំចូលរួមផង», «កំពុងឆ្ងាញ់ផង អ៊ីចឹងៗអីអ្នកណាមិនភ្ញាក់», «ប្រយ័ត្នណា សំណាងហើយដែលវាមិនចឹកពេលយើងមិនដឹងខ្លួន» ជាដើម៕ ប្រជាប្រិយ
