ខេត្តព្រះសីហនុ ៖ ករណីគ្រោះថ្នាក់ចរាចរណ៍មួយរវាងរថយន្ត១គ្រឿងបុកគ្នាជាមួយរថយន្ត១គ្រឿងទៀត បណ្តាលឲ្យរងរបួសមនុស្សចំនួន ០៣នាក់ នៅលើកំណាត់ផ្លូវល្បឿនលឿនរាជធានីភ្នំពេញ-ខេត្ដព្រះសីហនុ ដែលមិនទាន់អនុញ្ញាតិឲ្យដំណើរការនៅឡើយ ។
ឧបទ្ទវហេតុគ្រោះថ្នាក់ចរាចរណ៍ខាងលើនេះ បានកើតឡើងកាលពីវេលាម៉ោង១២និង១០នាទីថ្ងៃទី០៥ ខែមិថុនា ឆ្នាំ២០២២ ស្ថិតនៅលើផ្លូវល្បឿនលឿន ចន្លោះគីឡូ១៣៤-១៣៥ ស្ថិតក្នុងភូមិស្ទឹងឆាយខាងជើង ឃុំស្ទឹងឆាយ ស្រុកកំពង់សីលា ខេត្តព្រះសីហនុ ។
យោងតាមរបាយការណ៍សមត្ថកិច្ច បានឲ្យដឹងថា មុនពេលកើតហេតុ មានរថយន្តមួយគ្រឿង ម៉ាកព្រុស (PRUIS) ពណ៌ឈាមជ្រូក ពាក់ផ្លាកលេខ កំពង់ស្ពឺ 2C-2141 ធ្វើដំណើរក្នុងទិសដៅពីភ្នំពេញ ទៅខេត្តព្រះសីហនុ អ្នកបើកបរដោយឈ្មោះ ឡុក សៅ ភេទប្រុស អាយុ៣៣ឆ្នាំ រស់នៅខេត្តកំពង់ស្ពឺ អ្នករួមដំណើរចំនួន៨នាក់ រងរបួសចំនួន ០២នាក់ លុះមកដល់ចំណុចខាងលើ បានបុកនឹងរថយន្តមួយគ្រឿង ម៉ាក LUXES 350 ពណ៌ស ពាក់ផ្លាកលេខ ព្រះសីហនុ 2D-1838 ក្នុងទិសដៅផ្ទុយគ្នាពីព្រះសីហនុ ទៅភ្នំពេញ អ្នកបើកបរឈ្មោះ បុន សុខុន ភេទប្រុស អាយុ៦០ឆ្នាំ រស់នៅខេត្តព្រះសីហនុ អ្នករួមដំណើរចំនួន ០១នាក់ ឈ្មោះ ហូរ ម៉ារី ភេទស្រី អាយុ៥៤ឆ្នាំ រងរបួសចុកទ្រូង ត្រូវបានសាច់ញាតិ យកទៅពេទ្យភ្នំពេញ ។
សមត្ថកិច្ចបន្តថា វត្ថុតាងរថយន្ត២គ្រឿង ត្រូវបានសមត្ថកិច្ច នាំយកមករក្សាទុកនៅអធិការដ្ឋាននគរបាលស្រុកកំពង់សិលា ជាបណ្ដោះអាសន្ន រង់ចាំដោះស្រាយនៅពេលក្រោយ ។
សូមជម្រាបជូនថា គម្រោងផ្លូវល្បឿនលឿនភ្នំពេញ-ព្រះសីហនុ មានប្រវែង ១៨៧,០៥ គីឡូម៉ែត្រ ដែលមានតម្លៃប្រមាណ ២,០១៩លានដុល្លារសហរដ្ឋអាមេរិក បានបើកការដ្ឋានសាងសង់ កាលពីថ្ងៃទី២២ ខែមីនា ឆ្នាំ២០១៩ ហើយនឹងគ្រោងដាក់ឱ្យដំណើរការសាកល្បង នៅក្នុងខែកក្កដា ឆ្នាំ២០២២ ខាងមុខនេះ ។ ដែលផ្លូវនេះ តភ្ជាប់ពីភូមិ១ សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ ដល់ភូមិ១ សង្កាត់លេខ៣ ក្រុងព្រះសីហនុ ខេត្តព្រះសីហនុ ៕
